حكاية التيك توكر سـ,,ـوزي الاردنية بكلمتها الشهيره الشارع اللي ورا

في تيكتوكر مصرية إسمها سوزي الأردنية وسوزي ديه اللي اشتهرت بجملة “اه ،، الشارع اللي وراه” واللي طلعت ترند في كل مصر والمسلسلات خدت جملتها في رمضان اللي فات زي مسلسل العتاولة وغيره بل إن مسلسل أعلى نسبة مشاهدة كان مقتبس في خطه الدرامي من حياتها فالبنت ديه كانت السنة اللي فاتت لوحدها ترند بس اللي انت متعرفوش بقى أنها في ثانوي عام منازل وطول فترة امتحانات الثانويه العامه كانت بتنزل فيديوهات وبغزارة كمان وتروح الدروس وتقولك ديه المراجعة النهائية للامتحانات وهكذا والغريب بقي أنها كانت علمي علوم

فقولت علمي إزاي يعني اقنعني لكن فعلاً كانت علمي وبتأخد فيزياء و كيمياء وجيولوجيا فالطبيعي أنها تسقط ولو كانت نجحت فديه لازم تعمل تظلم أنها نجحت لكن الحمد لله سقطت زي ما هي بتتمنى عشان السنة الجاية تدخل ثانوي وتعيد الفيديوهات تاني لكنها عملت فيديو امبارح بتعلن فيه عن خبر سقـ,,ـوطها هتقولي هو في حد بيتباهى بخبر سقــ,,ــوطه هقولك تعالى معايا اوضحلك.

سوزي بنت من أسرة بسيطة جداً ولكن بين يوم وليلة بتلاقي نفسها ترند وتشتهر وتلاقي معاها فلوس وتطلع في البرامج وتعمل إعلانات للمحلات وتدخل اماكن أنا نفسي كمهندس شغال من ١٤ سنة لا يمكن أدخلها وهي نفسها طلعت في فيديوهات من كومباوند وقالت إنها مستغربة الجو في الأماكن ديه يعني لا في زحمة ولا غيره من اللي تعرفها.. المهم فإحنا كأبناء من أسر بسيطة بيكون الهدف الأساسي من تعليمنا هو الارتقاء بمستوانا الاجتماعي يعني بنحاول نتعلم كويس عشان نلاقي فرص عمل أفضل طب سوزي من غير ما تتعلم وجدت نفسها عندها فرص افضل يعني فلوس من الهوا و بتطلع علي الكاميرا تقول اي كلام و اي حاجة وبتجيب فلوس فليه تتعلم وتجتهد وتذاكر وتوجع قلبها وهي عارفة أنها حتي لو اتعلمت فاللي زيها بعد اربع سنين جامعة هيأخد كام يعني .. اربع آلاف طب خمسة..

فأحب اقولك إن هدايا الداعمين لسوزي في اللايف الواحد ممكن يعدي ال ٢٥ ألف جنية يعني لو البنت ديه عملت ٤ لايف في الشهر فمتوسط ربحها هيعدي ال ٨٠ ألف جنيه وده غير الإعلانات والدعايا اللي بتعملها للمحلات فتتعلم ليه يعني اديني سبب واحد يخليها حريصة علي التعليم وعشان كده طلعت بتضحك في اللايف وهي بتعلن خبر سـ,,ـقوطها.. سوزي بتخرج لنا لسانها بشكل ضمني وبتقولنا بشكل ضمني برضو بلا وكسة.. يعني المتعلمين في بلادنا خدوا إيه 🤔.. والصراحة بعد خمس سنين هندسة ودبلومة وماجستير فأحب اقولك يا سوزي عندك حق ومن هنا قررت اعمل زيك وهفتح صفحة جديدة علي الفيسبوك هقدم فيها الولا حاجة وعايز دعمكم ـ,,ـ